許冠傑為開騷減磅操肌 譚詠麟Keep Fat仲想表演鋼管舞
2018年05月17日17:19
許冠傑開騷要加辣妹伴舞,譚詠麟即自薦跳性感鋼管舞。

【星島日報報道】許冠傑(Sam)和譚詠麟(阿倫)將於8月5日至12日在紅館舉行《阿Sam&阿Tam Happy Together演唱會2018 Part 2 - 金曲速遞》,二人今日就以速遞員造型現身記者會,由Sam彈結他與阿倫Jam歌,唱了一首The Beatles的歌曲和二人的經典歌;繼而一起切飛機造型蛋糕,以配合「金曲速遞」的主題。

阿倫稱Sam的金曲無數,上次part 1只唱了3分之1,原本Sam接口說今次會唱另外的3分之2,不過阿倫即大叫:「唔好!咁樣要唱1個星期呀!」阿倫亦透露每晚都會有不同歌曲,Sam還會把舊歌填新詞,以報答粉絲支持。笑指出名忘詞的阿倫是否能重新背歌詞?阿倫即笑道:「傻咩!科學進步嘛,要記詞我唔做㗎!」二人又表示準備了200首歌,因時間關係,可能好多都只能唱半首;阿倫還笑指今次不會開日場,因Sam要湊孫,對方又有好多夏威夷的親戚前來,笑指加場與否可能要視乎Sam親友的搶飛情況。今次開8場騷,即使加場也有限數,Sam稱將會全力以赴。

阿倫又繼續爆料,指二人不單止會跳舞,Sam更主動要求「加辣」,他當然奉陪,笑言也許會變身辣妹跳鋼管舞。Sam解釋加辣原因是多點動感令視覺效果更好。問到會否操練身體?Sam希望多減10磅及把肌肉操得更實。阿倫則打趣道:「Sam會keep fit,我就keep fat,其實之前在內地舉行戶外演唱會,汗水濕透底褲,已經減了6磅,宵夜又喝了7碗去水的胡椒豬肚湯,體重應該共輕了10磅。Sam就早於3個月前已fit到漏,仲人靚歌甜,所以如果Sam叫我一齊做gym我都會,因為我很喜歡他,他是我的偶像,要求甚麼我都會做,不過他沒開口就算,大家都可以好過點。」聽到阿倫落足嘴頭讚自己,Sam笑到哈哈聲,指不用阿倫辛苦,可不用操練,反正每晚演出後都會瘦。

更多新聞